彝族文化网络博物馆（2001年创建）
ꆀꌺꆀꉙꃅꆀꉙꍅꇙꀕ
—ꇁꂷꃴꇤꁱꇐꉻꏑ
ꁱꊿꃆꂮ：
ꇁꂷꃴꇤ,ꑝꅇꁶꏂꃀꌝꊿꒆꌺ,ꀋꃅꀒꎂꏃꂱꊈ,ꑲꊈꇬꐥ。
1957ꈓꁱꂷꌷ1959ꈎꌶꅐ,1961ꈓꇩꏤꃄꎆꍈꄉꌌꑣꇬꈅꏹꄻ,1972ꈎꐕꌊꇪꎹꇬꊉꎻꌋꆀꇝꊈꉼꃛꍗꏓꃅ,1976ꈎ6ꆪꑝꅇꑤꇬꄉꍏꑷꊿꊾꅇꂷꁱꂷꌶꅉꇬꋍꃢꌷꋺ。1980ꈎꄀꌌꀒꎂꑤꑲꊈꇬꌤꃅꇁ,1983ꈎꍏꊿꋅꇥꀯꌶꅉꇬꃅꄲꇖꁮꆪꅇꁏꇮꇐꌷ。ꂴꆽ13ꈎꇬꅉꆐꆈꌠꁱꂷꊼꇅꌧ,ꉌꈲꆈꌠꁱꂷꐯꇯꌧ。1988ꈎꅇꁏꇮꇐꀁꂥꊐꌠꊌꄉ;1908—1990ꈎ7ꆪꇬꑟꌠꆈꌠꁱꂷꇐꀳ、ꁮꅉ、ꒊꇐ、ꈨꏀ、ꆏꊂꅇꏑꁱꌠꌋꆀꁏꁱꄉꌠꑴꉱꌌ《ꆃꎭꉜꇐꁱꀕ》ꋐꌠꇬ26ꋐꇬꄀꋺ,《ꆃꎭꑍꄜ》ꁬꌠꇬ100ꎖꁬꄀꋺ。ꆃꎭꊞꏦꑠꉼꇬꌋꆀꌜꅇꁏꑠꉼꇬꉼꑼꂷꑌꃅꋺ,ꄯꒉꁱꄻꃆꂮꈁꁠꇖꃢꊌꋺ。
ꉉ ꀽ
ꄯꒉꋋꋐꆹꋍꄙꈬꉐꉆꈎꅑꅸꀋꃋꑍꄙꆀꊰꑋꈓꑟꇬꊨꏦꀃꅉꉪꇐꏢꇐꌋꆀꊨꏦꁱꁏꄉꌠ,ꎴꁱꌧꇐꑴꉱꃅꑍꉐꌕꄙꎖꊱꐥ:ꋋꈨꇢꊪꇬꀉꑌꌠ《ꆃꎭꉜꇐꁱꀕ》ꋐꌠ《ꆃꎭꑍꄜ》ꄯꒉꁬꌠꇬꄀꋺꌠ,ꄯꒉꋋꋐꆏꁮꅉꅺꊈ、ꇐꀳꇐꏢ、ꉙꅇꂘꅇ、ꅇꂷꇣꋲꅲꌒꋍꑠꀉꑌꃅꐊ,ꅺꌡꇬ:“ꏗ”ꐛꐩꐛꃽꏗ,ꆿꃀꆿꎐꏗ,ꀉꐔꑌꁧꏗ;“ꇿ”ꈱꌠꈱꀖꇿ,ꑽꌠꄻꀱꇿ,ꁍꑗꑭꑌꇿ……ꅋꅝꑱꅝꉮꏣꐥ,ꌦꅇꌋꅅꑇꌠꑽꃤꐥꌠꃆꂮꈨꑌꐊ,ꄯꒉꋋꋐꁱꄻꄮꇬꇁꂷꌺꋊꌺꃤꌋꆀꐋꀨꐥꊈꀉꑌꈨꉢꁧꎁꃅꊋꁈꄏꇃꀤꇃꄻ,ꈜꀕꇈꁌꐘꑤꇁꂷꀜꍅꎆꃀ5000ꂷꄙꉢꁳ,ꃺꄧꑤꀀꌠꇁꂷꀈꉼꏤꌋꆀꆃꎭꍏꊉꆃꇬꌧꃀꌟꒉꐝꊒꆀꁬꏤꉠꎁꃅꈓꇤꊊꇤꈭꄐꈜꄎ、ꉈꇬꑓꑣꃅꊋꃹꏣꃹꅗ,ꆍꋋꈨꋍꃅꊋꃹꈭꐨꀂꆀꉠꄯꒉꋋꋐꅐꇁꄎꌠꉬ,ꉢꆍꏭꑆꊋꀱꌐꇁꀋꉆꀐ,ꆍꏭꈁꎭꀕꀐ,ꆍꏭꇗꅉꃅ。
