图书分类

民间文学

《彝族克智》

出版单位:四川出版集团 四川民族出版社 出版发行 编号:ISBN7-5409-3284-8/K•252( 作者:《彝族克智》编委会 编 开本:大16开 页数:975页 出版时间: 装帧:精装 定价:0.00元

书籍介绍

ꅇ ꌐ ꁌDxf彝族人网

 Dxf彝族人网

   ꆈꌠꆹꐩꋊꀊꎴ、ꊻꂷꀉꑌ、ꋥꁕꀊꐯꌠꍏꉸꊿꋅꉬꊰꃘꁯꌠꈐꏭꋍꁯꉬ。ꆈꌠꆹꐧꋦꐩꋊꈺꆹꎳꆹꀋꂿꊨꌠꈐꏭꄉꊋꋠꏢꅝꃅꀻꎆꅷꀃꑍꋍꄮꑟꇁꌠꉬ。ꐩꋊꆺꊂꇬꆈꌠꌧꇐꁱꀕꍸꇐꃴꇁꆧꈤꒉ、ꏂꇁꏪꈤꁏꑠꌐꀋꉆꃅꐥ。ꀑꐱꃅꉉꇬꐞꃀꀉꒉꑠꌕꐘꐥ:ꋍꐘꆏꏂꀨꊋꒉꃅꐥꌠꀘꂾꌧꇐ;ꑍꐘꌠꆏꅡꈭꌟꒉꌌꌠꈌꈴꌧꇐꃆꍝꑘꇠꃆꂮꃣꈌꄉꏦ;ꌕꐘꌠꆏꄯꒉꏂꀨꀁꑌꃅꐥꌠꎃꀕꌧꇐ。ꎃꀕꌧꇐꈐꏭꆹ《ꁱꋊꅺꊈ》ꌋꆀ《ꂘꃅꄯꒉ》ꏂꀨꑠꆏꀱꉠꄹꐒꃅꇇꁱꄉꌠꐥ,ꀉꁁꆏꈌꈴꌧꇐ《ꈍꎞꃨꆳ》、《ꀉꁌꁮꅉ》、《ꊝꉗꃆꃀ》、《ꀊꌦꀕꇠꅇ》ꌋꆀ《ꇐꀳꇏꏢ》ꑠꌐꀋꉆ。ꋋꆹꍏꉸꊿꋅꌧꇐꁱꀕꍸꇈꌠꈐꏭ”ꃆꄙꈬꂷꁌ,ꏂꅪꈬꒀꁌ”ꀋꋌꌠꐩꋊꍸꇐꐘꉬ。Dxf彝族人网
  《ꈍꎞ》ꄷꌠꆹ“ꈌꈴꄉꎞꌊꐺꌠꅇꂷꉐꂷꈨꄜ”。ꎃꀕꈌꈴꌧꇐꈐꏭꃆꃀꃷꁨꀉꑌꐯꀉꑌꌠꆏ《ꈍꎞꃨꆳ》ꋌꑵꉬ。ꋋꆹꊋꒉꌠꌌꑮꑟꅪꏷ、ꊿꀘꑳꂿ、ꁍꃀꀿꃀꃀꐚꄮꇬꀉꄂꌧꑵꉬ。ꀋꃋꏓꈹꁰꄻꐯꇯꄉꌠ《ꆈꌠꈍꎞ》ꈐꏭꆹꀑꐱꃅꉉꇬꌕꆱꃅꐙ:ꀨꆱꌠꆏ《ꈍꎞꈍꃼ》;ꐧꆱꌠꆏ《ꁱꋊꅺꊈ》;ꂪꆱꌠꆏ《ꑗꉘꁧꀿ》。ꊿꀑꁮꅺꐳꌠꆹꌕꑍꌕꉖꌧꇬꌧꀋꌐꑵꉬ。ꄚꐰꆏꋍꆱꋍꆱꃅꉉꀽꂿ:Dxf彝族人网
   ꆈꌠꉹꁌꆹ《ꈍꎞꈍꃼ》ꋌꑵꏯ“ꈍꎞ”、“ꈍꃽꉏꏢ”、“ꈍꎞꃨꆳ”、“ꈍꎞꇐꀳ”、“ꈍꌧꉐꏵ”ꃅꉉꌠꐥ。ꋋꆹꆈꌠꌺꇖꀊꄙꊰꉐꈎ、ꊰꉐꃘꊰꈎꃅꋍꋏꇈꋍꋏꃅꈌꈴꄻꐯꂘꅷꀃꑍꋍꄮꑟꌠꉬ。ꌌꌧꄮꇬꆏꊋꒉꌠꌧꐋꃤꅇꃼꇬꈴꄉꀱꑵꉬꐛꅹ“ꇬꇉꅇꁖꅇꉉꇁꌠ”ꉬꑴꄷ,ꀑꁮꅺꐳꈧꌠꆹꌧꄟꐯꀋꌡꇬꆏꃆꃀꌫꄟꑌꐯꀋꌡꑵꉬ,ꃆꃀꋍꊱꌠꄺꀱꌊꀉꑌꑵꃅꌧꉆ。ꑠꅹꇯꍝꃅ“ꄩꆹꏸꋦꌟꃅꄖ,ꀏꆹꏜꋦꌟꃅꑌ”;“ꎺꂯꄻꂯꉌꃀꋌꂸꅓ,ꅲꂯꇭꂯꅺꀧꋌꂸꅓ、ꊐꂯꄻꂯꇬꇉꋌꂸꅓ,ꁱꂯꄻꂯꄯꒉꎭꆱꋌꂸꅓ”;ꀋꌧꇬꀋꌧ,ꌧꇁꆹꃯꆏ,“ꁦꀑꉒꐩꌟꃅꐩ,ꈤꀒꆳꐩꌟꃅꐩ,ꇉꅶꒉꐩꌟꃅꐩ,ꏦꏪꑿꐩꌟꃅꐩ”;“ꀑꐎꋋꈨꈌꀧꉛ,ꀍꆈꋋꈨꎹꀕꇤ,ꏃꊰꋋꈨꅳꀨꄂ,ꉆꊰꋋꈨꅳꌜꀕ”ꑵꉬ。ꌌꑮꑟꅪꏷꅉꌧꇬꆏꊈꈯꌐꈜ、ꉌꃅꑓꌒ、ꇦꒆꂪꎑ、ꋬꂻꈨꅪꃆꂮꑠꀉꄂꌧꉆ;ꌌꆀꃅꊿꀘ、ꁍꃀꀿꃀꃀꐚꅉꇬꌧꇬꆏꆅꌈꈻꌈ、ꌦꐨꆅꈜ、ꉌꐒꇁꎭ、ꌟꆈꈓꊐꊊꊐꃆꂮꑠꀉꄂꌧꉆꑵꉬ。Dxf彝族人网
  《ꆈꌠꈍꎞ》ꋌꋐꈐꏭ《ꈍꎞꈍꃼ》ꈧꌠꆹꃆꃀꉐꂷꂴꊁꐯꅑꋽ,ꆏꄿꉠꄩꐂ,ꉢꀱꅽꄩꍅꃅꅲꌒꏣꃅꏣꀋꉆꑠꀉꄂꄉ,ꇯꍝꃅꌞꌧꅉꇬꑌꄉꅲꌠꀋꏯꐙꄉ,ꉜꅉꉜꅉꊿꋌꎼꉌꃀꌃꇗꄓ,ꇯꍝꃅ“ꁡꊭꏬꑣꌟꃅꑣ,ꅲꇢꃅꐈꌟꃅꐈ,ꄸꈣꀋꃀꃅꀜꌠꃅꀜ,ꐱꈬꃬꄵꌟꃅꄵ”ꌠꀋꏯꄯꒉꋐꌠꉜꀋꌐꌦꈐꇤꇫꎭꊊꀋꉂꃅꎍꌠꉬ。ꌌꆈꌠꌧꇐꂿꇐꎥꃪ、ꉜꅍꄻꅍꃅꇬꁌꇐꈤꌠꉬ。ꈐꏭꐩꋊꌧꇐ、ꉪꇐꏡꇐ、ꂘꇐꑴꇐ、ꃄꂓꊁꂓꌋꆀꁦꂓꇈꂓꑠꀑꁮꅺꐳꃆꂮꌐꀋꉆꃅꐊ,ꄚꉜꇬꆃꎭꆈꌠꐥꐨꐥꄸꈨꑌꊿꉜꇫꅐꇁꉆꌠꉬ。Dxf彝族人网
  《ꈍꎞꈍꃼ》ꋋꈨꆹꎰꆈꇂꃴꉹꁌꈬꇬꎹꈹꏓꄻꌊꁰꄻꐯꇯꄉꌠꉬ。《ꈍꎞꈍꃼ》ꌧꂓꅑꌠꀎꋏꌟꒉꐝꏪꃮꑌ(ꀋꐥꀐ)、ꊂꋊꉊꆽꌭꏹ、ꐎꀘꆿꉐꏤꏣꀋꑌꃅꃆꃀꉐꂷꈁꄽꌧꉪꇰꀐ。1987ꈓꆏꌧꍧꊿꋅꄯꒉꅏꅉꇬ《ꈍꎞ》ꋋꈨꅏꄻꄷꐛꅹ,ꋍꄮꇬꏓꈹꁰꄻꅷꀋꃋꋍꄮꑟꌠꉬ。《ꆈꌠꈍꎞ》ꋌꋐꄇꄜꋊꃅꍑꅐꇁꌠꆹ,ꆈꌠꐩꋊꍸꇐꁉꃑꀂꏽꅐꌞꑆꊋꇰꀋꃀꃅꐥꐘꉬ。Dxf彝族人网
   《ꁱꋊꅺꊈ》ꆏ《ꅺꊈ》ꌋꆀ《ꁱꋊ》(ꊿꋊ)ꑍꑵꐯꇯꄉꌠꉬ。《ꅺꊈ》ꆹꊋꒉꌠꐮꄹꐒꌌꐺꌠꇇꁱꏂꀨꐥꑵꉬ,《ꅺꊈ》ꆏ“ꅳꀨꌌꅲꄉꊉꐮꇰꌠꐩꋊꌧꇐꄜ”。ꐯꇯꀋꀮ、ꀋꃀ、ꌺꌕꑵꐥ。ꒉꆈꃅꄷꆹ《ꅺꊈ》ꀋꃀꑵꌠꁸꌊ《ꅔꐎꅺꊈꀦ》ꌋꆀ《ꏃꎹꅺꊈꀦ》ꑍꑵꃅꄉ。ꀋꃋꋊꍬꁭꄻꌊ《ꆈꌠꈍꎞ》ꈐꏭꇱꄉꋐꌠꆹ《ꏃꎹꅺꊈꀦ》ꑵꌠꉬ。ꂿꈬꐚꐎꃪꄧꐚꐎꀉꐞꀨꇈꌠꎭꂵꌅꃀꄰꅍꅐꇁꋐꌌꀨꃅꄉ,ꀉꁁꆃꎭꃅꄷꎹꌊꇁꌠꈬꋐꈯꄔꇬꑌꋍꈨꋊꍬꇬꇯꁰꄻꄉꌠꉬ。ꈐꏭꆏꀃꌋꀊꆨꃅꃴꃄꄅꁉ、ꃅꃴꃄꅉꄻ、ꐴꅑꉀꅿꌠꌋꆀꌦꑌꌗꑌꌠꅐꀨꅐꀿꃆꂮꑠꉉꀽꌠꉬ。ꂴꏭꉉꀽꌠꀋꏯꆀꋦꃅꄷꀑꐱꏲꄷꏓꈈꀉꒉꑠꈚꐛꀋꋻꐛꅹ,ꆀꋦꃅꈋꂱꑱꃄꁕꇬ《ꅺꊈ》ꊿꌌꐺꈧꌠꈐꏭꉉꄟꐯꀋꌡꄉ,ꌌꋍꈚꄉꌧꇬꆏꐯꀥꐮꑣꇬꎷꑵꉬ,ꑠꅹ《ꅺꊈ》ꌩꋴꐊꌠꉬꑴꄷ,ꀊꉘꌠꆗꑠꆏꌧꄮꇬꐯꀥꌊꐯꊨꐮꏈ、ꐯꅣꐮꇤꑠꐥ,ꋋꆹ“ꀀꀽꀋꊨ,ꐭꉙꀋꐊ”ꒉꄸ。Dxf彝族人网
  《ꏃꎹꅺꊈꀦ》ꈐꏭꃆꃀꉐꂷꈧꌠꁸꌊꀊꐎ、ꀈꋓ、ꀉꆈꌕꏠꃅꄉ。ꌌꑮꑟꅪꏷꅉꇬꌧꇬꆹꀊꐎꌠꀉꄂꌧꉆ,ꋌꀋꉬꑲꆏꃥꌋꄰꏸꇁꉆꌠꉬ。“ꍜꇰꀉꇐꃆꂮ”ꈧꌠꆏꀈꋓꌠ;“ꇰꇁꑳꒉꊰ”、“ꉭꁨꋦꆀꃅ”、“ꀊꑙꐩꍀ”ꌋꆀ“ꐧꈔꐧꈤ”ꃆꂮꈧꌠꆏꀉꆈꌠ。ꌌꆀꃅꊿꀘꅉꇬꌋꆀꁍꃀꀿꃀꃀꐚꅉꌧꇬꆹꉬꇮꌧꌐꉆꌠꉬ。Dxf彝族人网
  《ꆈꌠꈍꎞ》ꈐꏭ《ꁱꋊ》ꈧꌠꆹ“ꊿꋊ”ꁱꄉꌠꄜ,ꀉꁁꉉꇬ“ꊿꁬꎶꌠꋊꄜ”ꄷꌠꑌꐥ。《ꏃꎹꅺꊈꀦ》ꈐꏭꀃꌋꀊꆨꏃꇗꊇꄮꌺꒆꀿꀋꂿꅉ,ꏃꇗꊇꄮꌅꅪꏁꌋꒃꇈꌺꒆꀿꂿꉈꄉꌗꅸꈬꉻꐈꆀꍂꑟꌠꆏꋍꉐꑋꊏꃘꋊꐛ,《ꆈꌠꈍꎞ》ꈐꏭꁱꋊꈧꌠꆏꈬꉻꐈꆀꉇꄉꁱꅷꁧꌠꉬ。《ꁱꋊ》ꆹꂱꑱꋊꂱꑱꁱꄉꁨꌠꐥ,ꊋꒉꌠꈬꉻꐈꆀꉇꄉꁱꅷꇁꌠꀉꄂ,ꈬꉻꐈꆀꂾꃤꈧꌠꆏꏓꈹꁰꄻꐯꇯꄉꀉꑌꃅꀋꐥ。ꌌꋍꈚꄉꌧꇬꆏꈌꈴꄉꌧꑵꉬ。《ꁱꋊ》ꆹꀉꑌꑵꉬꄉ,ꁰꄻ《ꆈꌠꈍꎞ》ꇬꇱꄉꌠꆏꊿꋊꇬꊿꑫꋍꑵꌠꋍꐞꀉꄂꁱꇬꄀꄉꌠꉬ。ꊿꋊꆹꊋꒉꌠꂿꈬꌋꆀꋍꈭꇍꀀꌠꃤꉬ。Dxf彝族人网
  《ꆈꌠꈍꎞ》ꈐꏭ《ꏃꎹꅺꊈꀦ》ꇬꉜꇬꐧꋦꃰꊿꆹ,ꉇꆹꌿꁨꌺꇰꇖ;ꉇꆹꀊꑙꐩꍀꇖ;ꈏꆹꐧꃅꃵꃶꇚꊫꇖ;ꉇꆹꏃꇗꊇꄮꇖ;ꉇꆹꃱꇍꐈꀮꇖ;ꉇꆹꁍꉻꌺꌕꇖ;ꈏꆹꃰ、ꎔ、ꁮ、ꂾ、ꉒ、ꉾꃘꁯꌠꇖꉬꏭꐛ。ꋋꆹ“ꎰꆈꑿꈜ,ꌭꈈꄇꈜ”ꀋꏯꄇꃅꄇꇖꀕꃅꊨꄅꃱꉼꀐꌠꉬ!ꑠꅹ,《ꆈꌠꈍꎞ》ꈐꏭꊿꋊꉪꏓꈹꁰꄻꄉꈧꌠꆹꈬꉻꐈꆀꇬꄉꎭꅷꇁꌐ,ꋋꆹꐩꋊꀋꎪꐛꐨꌋꆀꐮꊒꀐꌠꉬ。Dxf彝族人网
  《ꅺꊈ》ꈍꑌꑵꌠꇬꉜꇬ,ꆈꌠꁍꁈꆹꀉꑌꃢꈤꆃꎭꃅꈋꃹꇁꋺꀐꐤꁮ。ꄷꀋꁧꁍꉻꌺꌕꆹꆃꎭꃅꈋꒉꏂꁨꈌꄉꈤꌠꉬꏭꐛ;ꈬꉻꐈꆀꋪꀕꁍꃴꄉꈤꇈꋍꑊꌺꇖꈧꌠꈐꏭꄹꁆꀉꄂꈤꀱꏿꆃꎭꃅꈋꃹꇁꌠꏭꐛ。ꋋꈨꈣꀱꏿꆃꎭꃹꀋꇁꌦꂾꆃꎭꃅꈋꋌꈚꇬꆈꌠꌋꆀꀉꁁꊿꋅꑠꀉꑌꃅꇬꀀꇈꀐꏭꐛ。ꋋꈨꈤꀱꏿꆃꎭꃹꇁꉇꆏꐯꌼꐮꉔꄉꐈꌌꈬꉻꐈꆀꐛꌐꌠꉬꏭꐛ。Dxf彝族人网
   ꐧꋦꐩꋊꈺꆹꎴꆹꀋꂿꊨꌠꈬꇬꄉꊿꋅꋋꈨꐯꌉꐮꆳ,ꐯꇏꐮꋠꅷꇁꇬꆏꀉꁁꊿꋅꑠꌉꈿꅉꄉꆈꌠꁮꌊꇁꇈꀊꉗꃅꐯꌼꐮꉔꅷꇁꇬꆏꐈꆈꌠꐛꁧꌠꑌꐊ,ꌉꈿꅉꇬꄉꌠꁮꌊꁧꌠꆈꌠꈧꌠꑌꐈꀉꁁꊿꋅꐛꁧꌠꐥ。ꆈꌠꇐꀳ“ꃺꈤꌅꂮꐛ,ꑌꈤꇓꐚꐛ”ꄷꑠꇬꐥ。ꐧꋦꐩꋊꂴꈻꊁꀋꌠꇬꄉꐧꋦꃰꊿꋋꈨꃸꁏꉆꆽꃅꐯꌼꐮꉔꄉꀻꎆꅷꇁꇬꆏ,ꀉꄉꋍꂷꌺꈧꌠꑌꀊꉗꃅꈤꅷꁧꇬꆏ,ꄹꁆꆏꀉꄉꌅꈌꌬꇈꅀꇇꇐꇇꆺꀉꇨꄉꌅꐛꁧ,ꌺꇖꀉꑌꄹꁆꌠꆏꀱꋍꇓꋍꐚꐛꁧꃅꐛꅹ,ꆀꃅꇖꈋꌅ、ꇓꐚꑠꑵꇫꐥꇈꌠꉬ。《ꏃꎹꅺꊈꀦ》ꇬꉉꇬꑌ“ꀒꋤ、ꆈꌠ、ꉌꈲꌕꁯꐯꇯꐧꃅꃵꃶꌺꉬꑴ”ꄷ。ꑠꅹ,ꍏꉸꊿꋅꀉꑌꄹꁆꌠꆹꉬꇮꋍꈚꄉꐞꇁꌐꌠꉬ。Dxf彝族人网
  《ꁱꋊ》ꋋꈨꑌꊋꒉꌠꈌꈴꄻꐯꂘꇈꑵꉬ。ꀉꑌꋊꃅꈌꈴꂘꅸꁧꇬꆏꊿꎺꏣꐯꀋꌡꄉꇢꊭꇬꋍꈨꋋꈨꊿꄝꆼꈘꅀꆹꑽꆽꀠꑠꐊꏭꐛ。ꀋꃋꉪꁱ《ꆈꌠꈍꎞ》ꈐꏭꇱꄉꈧꌠꉜꇬ,ꀃꌋꀊꆨꏃꇗꊇꄮꍂꇬꄉꌗꅸꀋꃋꊿꇫꐥꌠꇭꀧꇬꑟꌠꈬꉻꐈꆀꑍꁯꌠꋊꐯꀋꎵ。ꄹꁆꆏꋍꉐꈬꊰꋊꐛ;ꄹꁆꆏꋍꉐꃘꊰꋊꎖꀉꄂꐛ。ꋋꆹꐩꋊꀊꎴꇨꄉꇢꊭꇬꋍꈨꋋꈨꊿꄝꆼꈘꆘꅝꅀꆹꑽꆽꀠ,ꀋꉬꀐꇬꐝꅉꇬꊛꆹꑽꌠꉬꏭꐛ。Dxf彝族人网
   ꀋꃋꁰꄻ《ꆈꌠꈍꎞ》ꈐꏭꇱꄉꌠ《ꁱꋊ》ꈧꌠꑌꉪꊇꊋꃤꀄꊭ、ꇇꇐꀁꁧꇨꄉꆃꎭꃅꈋꅀꆀꋦꃅꄷꃅꏓꈹꐯꇯꈴꌐꀋꄐꑴꌦ,ꏓꈹꌌꁰꄻꄉꀐꈧꌠꑌꍤꆗꀋꈴꄉꐛꀋꒆꅀꆹꑽꆽꀠꑠꐊꑴꌦꄉꐯꀥꐮꑣꑠꐊꏭꐛ。ꄚ,ꈍꃅꉉꄿꂿ,ꉹꁌꈬꇬꀋꏯꂱꑲꋧꁧꃅꁱꄉꊾꂿꋍꑵꌌꐺꈧꌠꆹꏣꀋꋌꀐꌠ;ꌌꆈꌠꐩꋊꃆꂮꎥꃪꇬꑌꏂꀨꁌꇐꈤꌠꉬ。ꆈꌠꋊꏓꈹꁰꄻꎖꋪꌋꆀꏡꁈꉾꃪꑠꐘꑌꈭꀺꈜꀺꄉꀐꌠꉬ。Dxf彝族人网
  《ꑗꉘꁧꀿ》ꆹ《ꁧꀿ》ꌋꆀ《ꑗꉘ》ꑍꑵꄻꐯꇯꄉꌠ,ꋋꑌꄡꇗꎃꀕꌧꇐꈐꏭꈌꈴꃆꃀꑵꉬ。ꊿꉈꒉꎹꌠꆏꂱꊨꏦꁱꌊꄯꒉꏂꀨꃅꄉꌠꑌꐥ,ꄚ,ꊿꎺꏣꌋꆀꀑꁮꅺꐳꐨꐯꀋꌡꄉꏂꀨꋋꈨꑌꈐꏭꃆꃀꉐꂷꅑꐪꐯꀋꌡ。《ꑗꉘꁧꀿ》ꈐꏭꆏꋍꑞꋍꑵꁧꀿꈧꌠꄈꃷꁨꀉꑌꉻꃅꐙ,ꑗꉘꆹꌌꐯꁳꍜꇠꎻꑵꉬꄉꃷꁨꀊꅰꀉꑌꃅꀋꐥꑵꉬ。ꀎꋏꌟꒉꄹꇬ“ꑗꉘꃴꇉꀕ”ꌠꉬꄷ,ꌌꇯꍝꃅꌧꄮꇬꆏꀑꐱꂪꐱꃅꀉꄂꌧꑵ,ꄹꁆꉉꇬꑠꌧꀋꇮꄷꌠꇯꐥ。ꄚ,《ꆈꌠꈍꎞ》ꋌꋐꆹꆈꌠꐩꋊꆺꊂꇬꏂꀨꁱꇐꂓꅑꄷꀋꁧꄇꄜꋊꃅꍑꄻꄉꌠꀨꇊꀨꋐꌠꉬꄉ,ꑗꉘꃆꃀꉪꇬꎷꊌꄎꈧꌠꆏꉬꇮꇬꇯꄉꀐ。Dxf彝族人网
   ꆈꌠꐩꋊꆺꊂꇬꀃꌋꀊꆨꃀꏃꎹꀨꇬꆹ“ꌠꇩ”、“ꒉꆈꇩ”、“ꄀꇩ”ꌋꆀ“ꇂꍋꇩ”ꀋꏯꃅꄷꃅꏦꇩꏦꀄꊭꑠꐛꋺꑴꇬ,ꆀꋦꃅꈋꃅꀑꐱꏲꄷꏓꈈꀉꒉꈚꐛꀋꋺꄉ,ꆈꌠꌺꇖꈧꌠꐞꌊꂱꅉꀊꉗꃅꀀꅷꁧꇬꆏ“ꀀꀽꀋꊨ,ꐭꉙꀋꐊ”ꄉꌧꇐꁱꀕꍸꇐꇣꋲꐯꀋꌡꑠꀉꑌꃅꐥꁧꀐ。ꀊꐯꃅꉉꇬꒄꇂ(ꒊꆈ)、ꌧꍧ、ꇭꍏ、ꇨꑫꀀꌠꌧꇐꁱꀕꍸꇐꇣꋲꄷꀋꁧꊿꋋꈨꋋꂿꀋꋻꑠꌐꀋꉆ。ꀁꐯꃅꉉꇬꆃꎭꃅꈋꒉꆈ、ꌕꅔ、ꏃꎖ、ꀊꄙꌋꆀꇤꇉꀀꌠꌧꇐꁱꀕꍸꇖꇣꋲꄷꀋꁧꊿꋋꈨꋋꂿꀋꋻꑠꐥ。ꀋꃋꋋꇅꇬꎆꏣꇇꇐꌋꆀꊾꊋꊿꌗꑠꇬꀋꀙꄉꊿꋋꏓꈹꐯꇯꀋꄐꑴꌦ。ꇯꍝꃅ“ꑓꋪꂾꅉꑭꇇꇬꀋꑟ,ꅳꀨꑲꅉꇇꏸꇬꀋꑟ,ꉌꃀꉪꅉꐰꇑꇬꀋꑟ”;“ꉌꃀꁦꀑꉪ,ꐰꇑꁧꑭꊰ”ꃅꎍꑴꌦꌠꉬ。Dxf彝族人网
  《ꑗꉘꁧꀿ》ꈐꏭꋍꑞꋍꑵꁧꀿꃆꃀꈧꌠꆹꆃꎭꑭꊂꃤꐯꇯ,ꀑꐱꂪꐱꃅꐊꀐꑴꇬ,ꒉꆈꃅꄷꃤꄈꃷꁨꀉꑌꉻꃅꐙ。ꈐꏭꃆꃀꂒꆹꐯꌟꑴꇬꌧꏦꐯꀋꌡꈧꌠꆏꉬꇮꁱꇬꇯꄉ,ꅺꌡꇬ《ꑣꁧꑣꀿ》ꌋꆀ《ꃬꁧꃬꀿ》ꀋꏯꑠ。ꁧꀿꋋꈨꉜꇬꀊꅰꊿꋌꑅꃅꀋꐛꑴꇬ,ꋋꆹꊿꋅꌧꇐꍸꇐꇣꋲꑵꉬ。ꌌꆈꌠꐩꋊꆺꊂꇬꐥꐨꐥꄸ,ꉪꇐꏡꇐꌋꆀꌧꇐꑠꎥꃪꇬꂿꄐꀉꒉꃅꐥꌠꉬ。《ꑗꉘꁧꀿ》ꋋꈨꅇꂷꒃꋽ,ꅇꎔꉐꃨꑠꌐꀋꉆꃅꐊ。ꀋꄸꄷꑠꂿꀋꋻꈨꀋꋻꃅꉪꊂꋊꁳꉪꄉꉉꎻꇬꆹ,ꊿꋌꉪꋋꁱꇫꅐꇁꀋꄐꌠ,ꋋꆹꉪꆈꌠꐩꋊꇬꌧꇐꉬ。  《ꑗꉘꁧꀿ》ꇬꃆꃀꉐꂷꋋꈨꎹꈹꄮꇬꉹꁌꈬꇬꌧꒉꂾꒉꌠꀎꋏꈦꎖꃘꃀ,ꊂꋊꀉꄜꃅꑳꌋꆀꐞꎰꂷꑳꏤꏣꀋꑌꃅꃆꃀꉐꂷꈁꄽꌧꉪꇰꀐ,ꀘꂾꐎꀘꇓꍅꑌꈁꄽꉪꈽꎹꈹꈿꀐ。Dxf彝族人网
   ꆈꌠꐩꋊꆺꊂꇬ《ꆈꌠꈍꎞ》ꐊꈴꃅꏓꈹꐯꇯꄉꍑꌌꄯꒉꏂꀨꃅꄉꑠꋐꐥꀋꋻꑴꌦ。ꀋꃋ《ꆈꌠꈍꎞ》ꌧꏦꐊꈴꋌꋐꄇꄜꋊꃅꅐꇁꂯꄮꇬꆏ,ꉪꊇꆏꌧꍧꊿꋅꄯꒉꅏꅉ、ꉪꇇꀤꋺꌠꌧꒉꂿꒉꊈꌋꆀꄯꒉꋌꋐꉈꇬꑗꇬꌠꋍꏅꐋꀨꊈꏭꇗꅉꃅ,ꈀꎭꀕꀐ!ꉪꊇꌧꇐꀁꂥ、ꁰꄻꎖꋪꀋꇎꀋꂪ、ꄮꈉꑌꃛꏸꇨ,ꂿꃆꑌꀉꇖꇨꄉꁰꄻꌊꐛꀋꒆꅀꆹꑽꆽꀠꑠꐊꄡꑟ。ꌧꌠꂿꌠꌋꆀꉜꐋꋍꏅꌠꏣꀋꑌꃅꄜꌊꉪꇰꇁꅊꇈ,ꉪꊇꉌꊨꈬꇱꃅꋌꉚꄉꄺꀱꂠꀱꂿ。Dxf彝族人网
Dxf彝族人网

Dxf彝族人网
                               《ꆈꌠꈍꎞ》ꁰꄻꋈꌠDxf彝族人网
                              2002ꈓ7ꆪꁱꌐꌠDxf彝族人网
                              2004ꈎ2ꆪꄺꀱꌠ
Dxf彝族人网

Dxf彝族人网
Dxf彝族人网
ꎹ  ꀨ:
Dxf彝族人网

Dxf彝族人网
ꅇꌐꁌDxf彝族人网
Dxf彝族人网
ꈍꎞꈍꃼ
Dxf彝族人网

ꋍ——ꑍꉏꌕꊰDxf彝族人网
Dxf彝族人网
ꁱꋊꅺꊈ
Dxf彝族人网

Dxf彝族人网
ꃅꃴꃄꅉꋊDxf彝族人网
ꃈꊭꋊDxf彝族人网
ꃅꃴꃄꄅꁉDxf彝族人网
ꃅꃴꃄꅉꄻDxf彝族人网
ꐧꋉꈲꏿDxf彝族人网
ꃰꎝꋊDxf彝族人网
ꉭꁨꋦꆀꃅDxf彝族人网
ꀊꑙꐩꍀDxf彝族人网
ꍜꇰꀉꇐDxf彝族人网
ꈧꁻꆪꁻDxf彝族人网
ꈧꄂꆪꄂꇴDxf彝族人网
ꇰꇁꑳꒉꄐDxf彝族人网
ꉮꄵꐧꋉDxf彝族人网
ꐧꈔꐧꈤDxf彝族人网
ꀿꃼꀿꎹDxf彝族人网
ꏃꃅꒊꊝꂋDxf彝族人网
ꂽꄓꃝꄵDxf彝族人网
ꌅꋦꁍꎹDxf彝族人网
ꉒꐈꉾꐈꀥDxf彝族人网
ꈬꉻꉇꄅꌺꈬꋊDxf彝族人网
ꇂꏧꌺꌕꋊDxf彝族人网
ꌠꈄꌺꌕꋊDxf彝族人网
ꈬꉻꈐꄅꌺꈬꋊDxf彝族人网
ꃅꈮꌺꈬꋊDxf彝族人网
ꀍꃈꌺꈬꋊDxf彝族人网
ꀊꋧꀈꆺꋊDxf彝族人网
ꄹꀒꐈꇐꋊDxf彝族人网
ꄹꀒꃅꃴꌺꉬꋊDxf彝族人网
ꀋꂾꌺꈬꋊDxf彝族人网
ꈴꊧꌺꌕꋊDxf彝族人网
ꁉꆪꌺꉬꋊDxf彝族人网
ꇤꇗꁌꄜꋊDxf彝族人网
ꃴꁮꌺꌕꋊDxf彝族人网
ꉒꁏꃅꃴꌺꌕꋊDxf彝族人网
ꃅꃴꋒꒉꀋꃷꌺꑍꋊDxf彝族人网
ꐚꂩꑿꀑꋊDxf彝族人网
ꑷꈯꂸꉬꌺꑍꋊDxf彝族人网
ꑿꀑꑾꄮꌦꅪꋊDxf彝族人网
ꇌꂃꌺꉆꋊDxf彝族人网
ꐚꂩꁨꉙꁡꉐꋊDxf彝族人网
ꁡꉐꎬꊏꋊDxf彝族人网
ꆃꈯꌺꏃꋊDxf彝族人网
ꐚꂩꀋꇑꋊDxf彝族人网
Dxf彝族人网
ꑗꉘꁧꀿDxf彝族人网
Dxf彝族人网
ꋍꊱꌠ ꁧꐙꃅꌋDxf彝族人网
ꑍꊱꌠ ꐦꐛꃅꌋDxf彝族人网
ꌕꊱꌠ ꁧꇐꀿꇐDxf彝族人网
ꇖꊱꌠ ꃜꇤꁧꀿDxf彝族人网
ꉬꊱꌠ ꃝꁧꃝꀿDxf彝族人网
ꃘꊱꌠ ꐎꂾꁧꀿDxf彝族人网
ꏃꊱꌠ ꀎꇓꁧꀿDxf彝族人网
ꉆꊱꌠ ꅻꊪꅻꃰꁧꀿDxf彝族人网
ꈬꊱꌠ ꆸꎡꆼꇠꁧꀿDxf彝族人网
ꊰꊱꌠ ꀍꃨꁧꀿDxf彝族人网
ꊯꊪꊱꌠ ꀑꊫꁧꀿDxf彝族人网
ꊰꑋꊱꌠ ꃝꉐꁧꀿDxf彝族人网
ꊯꌕꊱꌠ ꑲꌺꁧꀿDxf彝族人网
ꊯꇖꊱꌠ ꀑꑌꁧꀿDxf彝族人网
ꊯꉬꊱꌠ ꇱꃏꁧꀿDxf彝族人网
ꊰꃘꊱꌠ ꄔꁧꄔꀿDxf彝族人网
ꊰꏁꊱꌠ ꊝꁧꊝꀿDxf彝族人网
ꊰꉆꊱꌠ ꃬꁧꃬꀿ(ꋍ)Dxf彝族人网
ꊯꈬꊱꌠ ꃬꁧꃬꀿ(ꑍ)Dxf彝族人网
ꑍꊏꊱꌠ ꑿꁧꑿꀿDxf彝族人网
ꑍꊏꋋꊱꌠ ꃅꁧꃅꀿDxf彝族人网
ꑍꊏꑋꊱꌠ ꎧꁧꎧꀿDxf彝族人网
ꑍꊎꌕꊱꌠ ꋂꁧꋂꀿDxf彝族人网
ꑍꊎꇖꊱꌠ ꈾꁧꈾꀿDxf彝族人网
ꑍꊎꉬꊱꌠ ꇌꁧꇌꀿDxf彝族人网
ꑍꊏꃘꊱꌠ ꊴꁧꊴꀿDxf彝族人网
ꑍꊏꏁꊱꌠ ꈌꁧꈌꀿDxf彝族人网
ꑍꊏꉆꊱꌠ ꍶꁧꍶꀿDxf彝族人网
ꑍꊎꈬꊱꌠ ꉛꁧꉛꀿDxf彝族人网
ꌕꊰꊱꌠ  ꀀꁧꀀꀿDxf彝族人网
ꌕꊰꋋꊱꌠ ꍯꁧꍯꀿDxf彝族人网
ꌕꊰꑋꊱꌠ ꎆꁧꎆꀿDxf彝族人网
ꌕꊯꌕꊱꌠ ꒉꁧꒉꀿDxf彝族人网
ꌕꊯꇖꊱꌠ ꃈꊭꁧꀿDxf彝族人网
ꌕꊯꉬꊱꌠ ꎺꁧꎺꀿDxf彝族人网
ꌕꊰꃘꊱꌠ ꑷꂿꁧꀿDxf彝族人网
ꌕꊰꏁꊱꌠ ꇓꁧꇓꀿDxf彝族人网
ꌕꊰꉆꊱꌠ ꏦꈜꁧꀿDxf彝族人网
ꌕꊯꈬꊱꌠ ꀉꉌꁧꀿDxf彝族人网
ꇖꊰꊱꌠ  ꐚꁧꐚꀿDxf彝族人网
ꇖꊰꋋꊱꌠ ꆳꁧꆳꀿDxf彝族人网
ꇖꊰꑋꊱꌠ ꃱꁧꃱꀿDxf彝族人网
ꇖꊯꌕꊱꌠ ꃰꃅꁧꀿDxf彝族人网
ꇖꊯꇖꊱꌠ ꑸꏓꁧꀿDxf彝族人网
ꇖꊯꉬꊱꌠ ꌅꁧꌅꀿDxf彝族人网
ꇖꊰꃘꊱꌠ ꏂꅪꇇꌒꁧꀿDxf彝族人网
ꇖꊰꏁꊱꌠ ꌦꌺꁧꀿDxf彝族人网
ꇖꊰꉆꊱꌠ ꀘꁧꀘꀿDxf彝族人网
ꇖꊯꈬꊱꌠ ꑊꁧꑊꀿDxf彝族人网
ꉬꊰꊱꌠ  ꏲꁧꏲꀿDxf彝族人网
ꉬꊰꋋꊱꌠ ꃼꁧꃼꀿDxf彝族人网
ꉬꊰꑋꊱꌠ ꑊꋌꁧꀿDxf彝族人网
ꉬꊯꌕꊱꌠ ꌦꁧꆅꀿDxf彝族人网
ꉬꊯꇖꊱꌠ ꉗꇉꄏꁧꀿDxf彝族人网
ꉬꊯꉬꊱꌠ ꀈꈬꉙꁧꀿDxf彝族人网
ꉬꊰꃘꊱꌠ ꇫꈘꐋꁧꀿDxf彝族人网
ꉬꊰꏁꊱꌠ ꂷꁧꂷꀿDxf彝族人网
ꉬꊰꉆꊱꌠ ꐩꁧꐩꀿDxf彝族人网
ꉬꊯꈬꊱꌠ ꑳꁧꑳꀿDxf彝族人网
ꃘꊰꊱꌠ  ꑣꁧꑣꀿ(ꋍ)Dxf彝族人网
ꃘꊰꋋꊱꌠ ꑣꁧꑣꀿ(ꑍ)Dxf彝族人网
ꃘꊰꑋꊱꌠ ꐳꐎꁧꀿDxf彝族人网
ꃘꊯꌕꊱꌠ ꉹꁧꉹꀿDxf彝族人网
ꃘꊯꇖꊱꌠ ꉾꁧꉾꀿDxf彝族人网
ꃘꊯꉬꊱꌠ ꑱꃀꁧꀿDxf彝族人网
ꃘꊰꃘꊱꌠ ꑗꉘꃴꌠDxf彝族人网
ꃘꊰꏁꊱꌠ ꃀꌺDxf彝族人网
ꃘꊰꉆꊱꌠ ꒉꐪꒉꐛDxf彝族人网
ꃘꊯꈬꊱꌠ ꁧꐙꒉꌠDxf彝族人网
ꏃꊰꊱꌠ  ꈻꐪꈻꐛDxf彝族人网
ꏃꊰꋋꊱꌠ ꉷꃅꌤꃚDxf彝族人网
        ꆀꃅꇤꇉꒉꌠDxf彝族人网
ꏃꊰꑋꊱꌠ ꃢꌬꐰꇑDxf彝族人网
ꏃꊯꌕꊱꌠ ꐯꈽꋦꌠDxf彝族人网
ꏃꊯꇖꊱꌠ ꆀꒌDxf彝族人网
ꏃꊯꉬꊱꌠ ꏸꃆꏸꂮDxf彝族人网
ꏃꊰꃘꊱꌠ ꌋꐪꌋꐛDxf彝族人网
ꏃꊰꏁꊱꌠ ꊽꉿꉬꐨDxf彝族人网
ꏃꊰꉆꊱꌠ ꀋꉉꃆꂮDxf彝族人网
ꏃꊯꈬꊱꌠ ꀋꃀꂓDxf彝族人网
ꉆꊰꊱꌠ  ꐧꒆꌺDxf彝族人网
ꉆꊰꋋꊱꌠ ꌺꒆꀦꌠDxf彝族人网
ꉆꊰꑋꊱꌠ ꅐꐪꅐꐛDxf彝族人网
ꉆꊯꌕꊱꌠ ꏂꃅꏂꌠDxf彝族人网
ꉆꊯꇖꊱꌠ ꏮꉈꄀꌠDxf彝族人网
ꉆꊯꉬꊱꌠ ꍝꅇꇠꅇ(ꋍ)Dxf彝族人网
ꉆꊰꃘꊱꌠ ꍝꅇꇠꅇ(ꑍ)
Dxf彝族人网

Dxf彝族人网
ꁱꌐꊂꅇDxf彝族人网
Dxf彝族人网