倮伍伟哲彝语散文:ꑌꊂꌕꆪ(阳春三月)

作者:倮伍伟哲 发布时间:2018-04-11 原出处:彝族人网

y3R彝族人网


y3R彝族人网


y3R彝族人网

  ꑿꆨꌋꈤꏸ,ꌩꋚꇓꂷꃨꀕꈨꌠꑋꆳꌌꃅꇕꄹꊂꃅꄁꃰꏿ,ꋍꏾꀕ,ꋍꀮꀕ,ꃮꆪꁯꆮꌡ,ꏂꆨꃰꌦꑌꀋꇊꌡ。ꈬ꒿ꈬꃪꈨꌠꎹꄓꃪꀮꐊꄉꈨꋩꈨꏦꐺ。ꉻꈫꉺꇤ,ꐷꈭꐷꇜ,ꄹꇬꄷꑐꀋꐥꅉꀋꐥ。
y3R彝族人网


y3R彝族人网

  ꀈꉙꐦꀞꏮ,ꊮꃨꏂꇠꀕ。ꃨꄩꁯꆮꐛꑿꆏꒉꉢꇁꏽ,ꑌꈌꑴꁱꌡ。ꑋꆳꆲꌙꀕꃅꁏꇁꇬꆏ,ꊮꃨꈨꌠꒈꂃꒊꆱꌟꃅꋍꇚꋍꇚꃅꌗꂴꆾꉜꄉꇁ,ꊿꋌꎼꑓꉱꏂꏪꀕ,ꀄꂼꂻꌠꌡ。ꉌꃀꂷꌠꃨꄩꁯꆮꐊꄉꄂꃰꏿ,ꏃꇁꃅꃴꐥꌠꀉꁌꀋꁨꈨꌠꑌꊿꎺꇁ,ꂱꑳꑴꅉꐥꐨꐥꄸꈨꌠꑌꊿꉪꇁ。ꀋꋓꀋꉪꃅꉌꐡꑓꐡꇁ,ꑓꁴꇬꇉꑌ。y3R彝族人网


y3R彝族人网

  ꀈꉙꒊ꒜ꒈꒉꒈꆹꎴ,ꒊ꒜ꆹꈈꉜꏂꅿꁯꇙ,ꉜꏂꆾꃴꌠꆗꑮꆜꑱꉙꆏꍡꉢꇰꃅ,ꉂꅇꆏꌧꉢꅲꃅ 。ꒉꃴꉜꏂꋌꅲꎧꑱꌠꌡ,ꀜꐥꀜꆗꏿ,ꒉꃴꀍꀠꈨꌠꑌꋍꑴꅉꋋꌅꀋꄐꃅꏅꇁ,ꎓꁨꎓꑳꀕ,ꑌꋩꑌꏦꃅ,ꑠꃅꐛꅹꋍꈓꊰꑌꆪ,ꑿꆩꀨꇬꄉꄸ。y3R彝族人网


y3R彝族人网

  ꆀꃅꁡꇤꏭ,ꆫꄓꂿꄓꊸ,ꀃꑍꋌꄮꆏ,ꋍꑍꀋꃅꊰꑌꀋꋠꈜ。ꆺꑳꀿꃀꑌꑿꊂꈹꐺ,ꁬꇁꆰꌺꋌꁏꃴꍚꀕ。ꆀꃅꆗꌺꌩꈪꇁꄉꌌ,ꃅꂿꃅꊨꃛ。ꅫꇁꌱꃀꇗꀵꈜꈹꐺ,ꋚꊪꒉꏾꃛ,ꌣꈚꐞꄿꏂꃅꄸ。y3R彝族人网


y3R彝族人网

  ꃅꈎꋍꈓꊰꑌꆪ,ꑿꆩꀨꇬꄉ,ꑌꆳꆲꌙꀕ,ꁬꇁꆰꌺꋌꁏꃴꍚꀕ,ꌩꋚꇓꂷꋌꁏꃨꈍꀕ。ꑌꊂꌕꆪꉐꐙꁌꇗꀕ,ꇗꇁꉐꂷꐴꅑꅿ,ꊧꅑꃨ。y3R彝族人网


y3R彝族人网

  ꑌꅐꑋꈌꁏ,ꑌꈌꉙꐞꀕ,ꑌꆳꀿꌗ꒜ꌗꌡ,ꋌꁏꃅꇖꄹꊂꎭ,ꈁꑟꊸꆣꀕ;ꑌꊂꉐꐚꐎꇁꏂꅪꌡ,ꋌꐛꇿꑟꋚꁧꅿꁮꇙ,ꁬꋲꆰꑟꑌꈌꄖ。 ꑿꆨꌋꈤꏸ,ꋧꃅꇤꄧꋌꌌꇉꄩꇪꀮꌠꃅꐞꄧꀕ。y3R彝族人网

  y3R彝族人网

  作者:倮伍伟哲(ꇉꃶꃤꎆ), 汉名:伍宁江,四川省凉山州西昌市y3R彝族人网

编辑: 阿着地 发布: 阿着地 标签: 倮伍伟哲 彝语 散文 ꑌꊂꌕꆪ 阳春三月
收藏(0 推荐(